La Bibia piemontèisa/Testament Vej/Cronache/2Cronache12
12
[modifiché]L’Egìt a debórda an Giuda
[modifiché]1Tutun, pròpi cand che Roboam a l’avìa stabilì frem e fòrt sò regn, chiel a l’ha bandonà la Lege ‘d Nosgnor e tut Israel a l’é andaje dapress an cost sò pecà. 2Ma për ël motiv che a l'ero stàit pa fidèj a Nosgnor, rè Sisach d'Egit, ant ël sò quint ann, a l'ha tacà Gerusalem. 3Chiel a l'avìa 1.200 chèr, 60.000 sivalié e un nùmer sensa fin ëd soldà che a l'avìo compagnalo da l'Egit, comprèis ij Lìbich[1], ij Suchita e j'Etìop. 4Chiel a l'é fasse padron ëd le sità fortificà 'd Giuda e a l'ha marcià contra 'd Gerusalem.
5Semaia, ël profeta, anlora, a l'é presentasse a Roboam e ai cap ëd Giuda che a l'ero assemblà a Gerusalem për motiv ëd Sisach. A l'ha dije: “A dis ël Signor: Ti 't l'has chitame. parèj che mi i l'hai bandonave ant le man ëd Sisach”. 6Ij cap d'Israel e dël rè a son umiliasse e a l'han dit: “Nosgnor a l'ha rason ëd fé sossì a nojàutri!”.
7Cora che Nosgnor a l'ha vëddù che a l'ero umiliasse, anlora a l'ha parlà a Semaia: “A son fasse ùmij e parèj mi i-j dëstruirai pa. Nen mach, ma da sì un pòch i-j libererai. Mi i dovrerai pa Sisach për ësversé mè fot contra ‘d Gerusalem. 8Contut, a dovran esse për un pò assogetà a chiel, për podèj fé esperiensa ëd lòn ch’a veul dì serve mi o serve ij potent ëd la tèra”.
9Parèj Rè Sisach d'Egit a l'é vnùit a Gerusalem e a l'é portasse via ij tesòr dël Templi 'd Nosgnor e dël palas real; a l'ha ravagià tut, comprèis jë scu d'òr che Salomon a l'avìa fasse fé[2]. 10Rè Roboam, pì tard, a l'ha scambiaje con dë scu ëd bronz che a l'ha fàit fé e peui a l’ha daje an guerna dle vàrdie reaj ch’a protegìo l'intrada 'd palas real. 11Tute le vire che 'l rè a visitava 'l Templi dël Signor, le vàrdie reaj a-j pijavo e pì tard a j'arportavo ant la sala dle vàrdie. 12Da già che 'dcò Roboam a l'era umiliasse, Nosgnor a l'ha tirà andaré da chiel soa ira e a l'ha pa dël tut dësblalo. Giuda, tutun, a l’ha dcò passà ‘d bej moment.
Somari dël regn ëd Roboam
[modifiché]13Rè Roboam a l’avìa stabilì frem sò govern a Gerusalem; chiel a l'avìa quarantun agn cora ch’a l'é vnùit a esse rè e a l'ha regnà disset agn an Gerusalem, la sità dël Signor sërnùa an tra tute le tribù për esse la ca 'd sò nòm. La mare 'd Roboam a l'era Amonita e as ciamava Nama. 14Chiel, contut a l’é stàit un rè gram përchè a l'era pa aplicasse con tut sò cheur a onoré Nosgnor coma ch'as deuv[3].
15J'event dël regn ëd Roboam, dal prënsipi a la fin, a son memorià ant le Crònache dël profeta Semaia e dël vëggent Ido, ch’a son na part dël registr genealògich dij rè. A son staie guere an tùit ij moment an tra Roboam e Geroboam. 16Peui Roboam a l'é andurmisse con ij sò antich e a l'é stàit sotrà ant la Sità 'd David. Sò fieul Abia a l'ha arpiassalo tanme rè.
Nòte
[modifiché]- ↑ O “j’Etìop”.
- ↑ Cfr. 1 Rè 10:16-17; 2 Crònache 9:15-16.
- ↑ O "a sërché Nosgnor".