La Bibia piemontèisa/Testament Neuv/Gioann/Gioann 16

←Gioann 15

La Bibia piemontèisa Gioann

Gioann 17→

Gioann

La Bìbia piemontèisa - Gioann 16

16

¹I l'hai dive ste còse perchè i na sie nen scandalisà tant da perde vòstra fede. ²A vë sbatran fòra da le sinagòghe, ma pì 'ncora 'd lòn, a rivrà l'ora che chi av massa a chërdrà 'd rende 'n servissi^[1] a Nosgnor. ³Av faràn ëste còse përchè ch’a l'han nen conossù nì 'l Pare, nì mi. ⁴I l'hai dive ste còse përchè cand ch'a në sarà l'ora iv arcòrde ch'i l'avìa bin divlo. I l'hai nen parlave 'd sòn dal prinsipi, për motiv ch'i j'era con voi. ⁵Ma adess mi i artorno da col ch'a l'ha mandame, e gnun ëd voi am ciama andoa ch'i vado? ⁶E përchè ch'i l'hai dive ste còse, la tristëssa a l'ha 'mpinì vòstr cheur. ⁷Chërd-me, iv diso la vrità, a l'é mej për voi ch'im në vada, përchè se 'm n'andèissa nen, ël Consolator^[2] a vnirìa pa da voi, ma s'im në vado, iv lo mandrai. ⁸E cand ch'a sarà vnù, chiel a përsuadrà^[3] 'l mond ëd sò pecà, ëd la giustissia 'd Nosgnor e che Sò giudissi 'd condan-a a l'é na realità. ⁹Ël pecà dël mond a l'é ch'as arfuda 'd chërde an mi. ¹⁰La giustissia a sarà arvendicà përchè i vado torna da mè Pare e im vedreve pì nen. ¹¹Ël giudissi 'd condan-a a vnirà përchè col ch'a dòmina sto mond coma 'n prinsi a l'é già stàit condanà.

¹²A-i é diverse d'àutre còse ch'i l'hai 'ncora da dive, ma i peule ancora nen capije^[4]. ¹³Ma cand ch'a sarà vnù lë Spìrit ëd la vrità, chiel av menerà an tuta la vrità, përchè a parlerà nen për sò cont, ma a dirà tut lòn ch'a l'avrà sentù, e av nunsierà le còse ch'a l'han da vnì. ¹⁴Chiel am glorificherà, për motiv ch'a pijerà dël mè e ch'av lo dirà. ¹⁵Tut lòn ch'a l'ha mè Pare a l'é mè: a l'é për lòn ch'i l'hai dit ch'a pijerà dël mè e ch'av lo dirà. ¹⁶Tra 'n pòch im vëdreve pì nen, e peui, nen tant pì tard, im vëdreve torna.

¹⁷E cheidun dij Sò dissépoj a l'han dit an tra 'd lor: "Còsa veul-lo dì: 'Tra 'n pòch im vëdreve pì nen, e peui, nen tant pì tard, im vëdreve torna'? E che veul-lo dì: 'Përchè I vado torna da me Pare'?". ¹⁸A seguitavo a disse: "Còsa veulo dì ste paròle: 'Tra 'n pòch'? I comprendoma nen ëd lòn ch'a parla!".

¹⁹E Gesù, ch'as ancorzìa ch'a vorìo ciameje cheicòsa, a-j dis: "I ciame an tra 'd voi lòn ch' i l'hai dive: 'Tra 'n pòch im vëdreve pì nen, e peui, nen tant pì tard, im vëdreve torna'? ²⁰An vrità, an vrità iv diso, ch'i piorereve e ch'iv lamentreve, e 'l mond as arlegrerà. Vojàutri i sareve trist, ma vòstra tristëssa a sarà cambià an alegrìa. ²¹Cand na fomna a partoriss, a sent ëd dolor, për motiv ch'a l'é rivà soa ora; ma cand che soa masnà a l'é nà, chila a s'arcòrda pì nen ëd sò dolor për la gòj ch'a l'ha d'avèj butà 'l mond na masnà. ²²Për vojàutri a l'é 'dcò parèj: adess i seve sagrinà, ma iv tornerai a vëdde, e vòstr cheur as n’arlegrerà, e vòstra gòj pì gnun av la portrà via! ²³An col di-là im fareve pì gnun-a domanda. An vrità, an vrità iv diso che tut lòn ch'i ciamreve al Pare a mè nòm, chiel av la darà. ²⁴Fin-a adess i l'eve ancora ciamà gnente a mè nòm; ciamé e i arseivreve: anlora vòstra gòj a sarà compléta.

²⁵I l'hai dive ste còse con ëd paràbole^[5], ma l'ora a ven ch'i l'avrai pi nen da dovré 'd paràbole, ma iv parlerai ëd mè Pare al dëscovert. ²⁶An col di-là i ciamreve a mè nòm, e iv diso nen ch'i pregherai 'l Pare për voi, ²⁷përchè 'l Pare midem av veul bin, për motiv ch'i l'eve vorsù bin a mi e ch'i l'eve chërdù ch'i son surtì da Dé. ²⁸I son surtì dal Pare e i son ëvnù al mond; e peui i chito sto mond e 'm në torno al Pare".

²⁹Ij Sò dissépoj anlora a l'han dije: "Varda, a l'é adess ch'it parle ciàir e ch'it deuvre pì nen ëd paràbole. ³⁰Adess i vëddoma che ti 't sas tut, e ch'it l'has nen da manca che gnun at fasa 'd domande. Për càusa 'd lòn i chërdoma che ti 't ses surtì da Nosgnor”

³¹Gesù a-j rëspond: "Chërdeve adess?". ³²L'ora a riva, o, për dila mej, a l'é già vnùa, ch'i sareve dësbergiairà, ciaschëdun për sò cont, e im chitereve; ma mi i son nen sol, përchè 'l Pare a l'é 'nsema a mi. ³³I l'hai dive ste còse përchè i l'abie la pas an mi; ant ësto mond i l'avreve 'd tribulassion, ma abie 'd fiusa, i l'hai batù^[6] 'l mond.

Nòte

1. O "un cult".
2. An grech “paràclit” ch’as podrìa ‘dcò volté an “Avocat” o “col ch’a ven an agiùt”, "col ch'a pijerà la fonsion dl'avocat", o "l'avocat difensor".
3. O "a rendrà testimoniansa al mond ëd pecà, ëd giustissia, e 'd condan-a".
4. O "i peude ancora nen soporteje".
5. O "figure", "alegorie", "metàfore", "similitùdin", "paragon", "an manera figurativa".
6. O "vagnà".