La Bibia piemontèisa/Testament Neuv/Filemon/Introdussion

Artorn

---

Introdussion

La litra dl’apòstol Pàul a Filémon a l’é ‘n test cort ma ‘d pèis ch’a dà d’amaestrament an sl’arconciliassion e ans l’ugualiansa dle përson-e an Crist. La data precisa ‘d compossission ëd costa litra a l’é nen certa, ma as la buta apopré ant tra j’agn 60 e 62 d. C. durant l’ampërzonament ëd Pàul a Roma,

Costa litra a l’é adressà a Filémon, un chërdent e amis ëd Pàul. A trata dzurtut ëd coma che Filémon a l’avìa da traté con Onèsim ch’a l’era në s-ciav ëd Filémon e ch’a l’era scapaje, apress d’esse dventà ‘n cristian e ch’a l’era rivà da Pàul durant so perìod ëd përzonìa. Pàul a scriv costa litra a Filémon për ciameje d’arsèive torna da chiel Onèsim e ‘d tratelo con binvolensa, pa pì coma në s-ciav ma coma ‘n frel an Crist. An costa litra Pàul a ciama a Filèmon ëd përdoné Onàsim e ‘d considerelo coma ‘n frel an Crist, pa pì coma në s-ciav. Cost mëssage a buta an evidensa l’ugualiansa an tra ij cristian e l’importansa dl’arconciliassion.

Pàul a dà espression a so grinor për Filémon e a buta an evidensa l’importansa dl’amor cristian ant la vita dij chërdent. Pàul a dis ëdcò ch’a l’é dispòst a arpaghé ij débit d’Onèsim e a ciama a Filémon d’arsèivlo coma ‘n don.

Bele se ancheuj a-i sìa pì nen la s-ciavensa coma ch’a-i era ant la società roman-a d’antlora, costa litra a trasmët ël mëssage sensa temp dl’arconciliassion, dl’ugualiansa an Crist e an sl’amor cristian. I l’oma sempe da manca e a l’é nòst dover ëd traté j’àutri con grassia, përdon e amor, a fà nen col ch’a l’era ‘l passà ‘d na përson-a e soa posission ant la società. An cissa a consideré coma nojàutri i peuda apliché costi prinsìpi an nòstra vita ‘d minca dì e an nòstre relassion con j’àutri.