Giovanni Gianotti/Mùsiche antiche
Mùsiche antiche
[modifiché]Mùsiche ‘d vers antich ch’im ven-e an ment
quàich vòlta d’improvis, cantand an festa
na speransa, un soris o na tempesta,
con dlicadëssa, grassia e sentiment.
L’ànima a preuva un vero godiment
man man che vòstra blëssa as manifesta,
ch’a spompa¹ e ch’a svaniss… e peui am resta
mach pì ‘l ricòrd d’un bel e car moment.
Ma ‘d vòlte ‘l cheur suj làver av bërbòta
tërmoland con passion quasi divòta,
come s’a recitèissa na preghiera;
e tut entusiasmà dal sens ch’a vòla,
s’esalta al son gentil d’ògni paròla
ch’a-j dà ‘l frisson dla poesìa sincera!