Carlottina Rocco/Primavera

Da Wikisource.
Jump to navigation Jump to search

Artorn a la tàula

Primavera[modifiché]

L’ha quàich rama già fiorìa
- bianche fior fàite a bochèt -
cola pianta scura e trìa
ch’a së spòrz dal murajèt.

Cite fior ch’as deurvo e as saro
ant un’onda përfumà
cite fior ch’a së spataro
s’a son pen-a socrolà

Ma daré 'd cola muraja
va a savèj còsa a-i sarà?
Primavera, bela faja
a l’é forse lì stërmà?

Lì ch’a pronta le violëtte
ch’a spatara për ij prà;
ch’a pitura le ciochëtte
da stërmé ant le bussonà?

Mach na rama già fiorìa
a së sporz dal murajèt.
L’é na cita maravija:
bianche fior fàite a bochèt