Carlottina Rocco/Mèis

Mèis[modifiché]

Galaverna, fiòca e gel, nebie grise a coato 'l cel,
e la merla për tre di stà stërmà drinta sò ni.

Ven Sant Ors con sò pajon, l'é la marca dla stagion, e
a-j dà man a Sant'Aghëtta, ch'a fà score la biarlëtta.

Riva Mars, con vent e pieuva, lus an cel la lun-a neuva,
për le rive a sponto già luvertin për la frità.

Ceresere, pruss, pomé, son fiorì ant ël vërzé, e dapress a 'n vent
sutil ven-o tuti ij seugn d'avril.

Nivolëtte, nivolon, as sent già 'l prim colp ëd tron, ma sta reusa
dësbandija zonzonand a va l'avija.

San Gioann, l'amsòira an man, as na va 'nt ij camp ëd gran e
as anvisco an mes ai pra ij lumin dle neuit d'istà.

San Lorens la gran caudura, pian, pianin l'uva a madura e
le stèile a dròco e a luso e ij farò sle crëste a bruso.

Con cavagne e cavagnin as vendumia për j'autin, ma ant le
combe e sle colin-e a-i son già le freidolin-e.

Rivo ij Sant con le castagne, tanta fioca sle montagne, e a la fin
Santa Catlin-a men-a ij beu a la cassin-a.