Carlottina Rocco/La gala 'd seda

Artorn a la tàula

La gala 'd seda

Basta na gala, basta ’n tòch ëd bindel,
përchè su dal cofnèt pian as dësvìa
un seugn così lontan e così bel.

Më smija ’d sente - la banda a soné...
Sla piassa granda - j’é ’l bal a palchèt.
Na nòta sclina, - a l’é ’l flagiolèt.
Veusto ch’i vado - na vòlta a balé?

Gira e dësgira e vals e corente,
ancora na vira, më smija ’d volé.
Le teste ch’a giro -parèj dij roèt.
e ij cheur?
Ij cheur s’anvisco - parèj dij brichèt.

Gira e dësgira - ancora na vira.
J’ombre së slongo - sël bal a palchèt.
e lòn ch’at resta?
Na gala ’d seda sarà ’nt un cofnèt.