Carlottina Rocco/An sla brova dël senté
An sla brova dël senté[modifiché]
An sla brova dël senté,
chi l’é nen ch’as fërmerìa,
a l’ombrëtta ’d na gasìa,
dòpo tanto caminé?
Un moment a sté a scoté
lì sla brova vërdolina
la vos frësca dla boschina...
Peui tornesse ancaminé...
An sla brova dël senté,
chi l’é nen ch’a cujerìa
cola fior ch’a l’é fiorìa
per podeila regalé?
An sla brova dël senté,
chi l’é nen ch’as fërmerìa,
a l’ombrëtta ’d na gasìa,
un moment a riposé?
Da «An sla brova dël senté» 1933