Arrigo Frusta/Còl dl’Assieta

Artorn

---

Còl dl’Assieta

Ël magior-brigadié Cont ëd San Bastian a sàuta ansima a la gran masera tirà su ant la neuit tut arlongh dël pian dl'Assieta e a dis:
"Messieurs les grenadiers dël Re, guardie dël Casal, guardie dël Forgiatz, ij Fransèis i-j sente? A bato già la charge.
Ciamé nen vàire ch'a son: a son tanti, des vòlte pì che noi.
E a l'han quatòrdes pess ëd canon.
E a vniran, iv lo dijo mi, a ondà sempre pì s-ciasse, pì rabiose.
Ma noi an ciamo ij bogianen. E l'ordin a l'é sempre col:
sté ferm e risparmié le cartatoce".
Ël magior-brigadié Cont ëd San Bastian, drit su la masera dël pian dl'Assieta, a seguita a dì:
"Messieurs les grenadiers dël Re, guardie dël Casal, guardie dël Forgiatz, tnì bin a ment lòn ch'iv dijo:
le cartatoce ch'i l'ève a son l'ùltime; ma finìe av resto ancora le bajonëtte, le cròsse dij fusij e ij ròch e le pere e j'onge.
Veteran dla Vràita, dl'Argentera, dl'Orm, scoté lòn ch'iv dijo:
se ij Fransèis a passo, se 'l Gran Serin a casca,
ël Piemont a l'é fotù".
E ij Fransèis a rivo: quarantamila contra setmila.
Pìfer e tamborn ai dan drinta 'd pì ch'a peulo.
Quatòrdes pess ëd canon a sparo a tut andé.
E la colòna dël general Arnaud as fa sota.
A riva a sent méter: e ij nòstri cito.
A riva a sinquanta: e ij nòstri gnente.
A tranta a pija ël dëslans: Urrah! Urrah!
Ël magior-brigadié Cont ëd San Bastian, drit ansima a la masera,
a comanda: "Feu!".
Prim assàut: finìe le munission.
Scond assàut: bajonëtte e cròsse dij fusij.
Ters assàut: ròch, pere, lastron.
Quart assàut a la disperà: general cavajer Bellisle
e general Arnaud a la testa 'd quatsent ufissiaj:
ij nòstri a l'han pì nen né fusij, né bajonëtte, né ròch ...
ai resta mach pì j'onge e ij dent.
Anlora, mòrt për mòrt, a sàuto adòss ai nemis, mòrt për mòrt.
E ant la mòrt a treuvo la vitòria.

E la canson dl'Assieta a dis parèj:

Quatre-cent officiers
gourmands de notre Assiette
pour en avoir pris trop
sont mort sur le carreau.
Souvenez-vous, Français,
souvenez-vous sans cesse
du goût de notre Assiette

Antratant a Napoli ij... fratelli d'Italia as pijo alegrament
ij pé 'nt ël cul dai caballeros ëd Flip quint e 'd Carlo Ters:
- Grazia vostra, eccellenza! -
E a spòrzo l'àutra ciapa.

Ch'as vëdda 'dcò: * La bataja ëd la Assieta: coj ch’a bogio nen (ël 19 ëd Luj 1747)