Aldo Daverio/Simiteri 'd montagna

Simiteri 'd montagna

Simiteri ’d montagna con quat cros,
ant ël silensi ancreus ëd le pinere,
quand che le nebie a calo giù legere
a perdse ant l’aria freida e sensa vos,
e as deurvo dosse drinta ’l cheur pietos
për tuti ij vòstri mòrt le mie preghiere,
vorrìa ’d cò mi, sota le vostre pere,
deurme ant un seugn ëd pas maravijos.
Sota la tèra freida ch’a madura
le smens portà dal vent ëd tramontan-a,
ch’a saran fior ëd menta e fior ’d giansian-a,
sente l’ombra ’d na cros drita e sicura,
coma n’oferta ’d fede al cel slargà,
mentre ch’i deurmo sol e dësmentià.

Da Parnas piemontèis Edission «Il Verdone» Torino 1943 (Arpijà an Róndole)