Aldo Daverio/Le smens

Artorn

---

Le smens

VAIRE ch’a son le smenss ch’a pòrta ’l vent
ant sò viagi pien ’d mùsiche e ’d frisson!
Fërvé, j’è ant l’aria già un presentiment
ëd violëtte stërmà sota ij busson.
J’è ant ël prim sol ’d fërvé na maravija
ëd profum che la tèra a manda sù;
profum asèrb ëd j’erbo patanù
ant ël profond dla vita ch’as dësvija.
A ciama i sò color, la tèra spalìa
dòp le bise tajente dl’invern cru,
color dla viòla, dël narsiss, dla dàlia...
Ij vent a canto travèrs j’erbo dru;
e ant l’aria vërdolin-a ’d prime feuje
la tèra a seugna cole smenss da cheuje.

Da Ël Tòr N° 9/10 ~ 22/12/1945 (Arpijà an Róndole)