Vittorio Bersezio/Le miserie 'd monsú Travet/pàgina 37
| ←pàgina 36 | Le miserie 'd monsú Travet |
pàgina 38→ |
| Artorn - La grafìa a l'é nen cola moderna ma cola dovrà dal Bersezio. |
Sena otava
Brigida e Barbarot.
BARBAROT (durvend la porta d'intrada) Pst!
BRIGIDA Ah! monssú Barbarot.
BARBAROT Sí a j'è 'l patè e le doi bôte.
BRIGIDA Presto! C'a vada an cusina e c'a m'speta là. Mi i vad a dije a la tota ch'i m'sento nen ben e ch'i vad a cogieme...
BARBAROT No, no, no.
BRIGIDA Coma no?
BARBAROT (posand 'l patè e le bôte s'la taula) Nen an cusina. A bsogna c'a l'abia pasienssa, c'a buta un mantil, 'na tovaja, quaicosa sí ansima e ch'i stago sí.
BRIGIDA Bravo! La tota a peul vni d'd'sa da un moment a l'autr.
BARBAROT «È previsto il caso!...» A trovrà giusta d'gent c'a l'ha piasí d'parleje.
BRIGIDA Ma ohei! monssú Barbarot, chiel a j gira.
BARBAROT Gnente afait. J'ôma d'invitati.
BRIGIDA D'invitati!
BARBAROT Sí. A son invitasse da lor, ma a fa l'istess. J'eu lassà la porta duverta për c'a podeisso 'ntré e a saran sí a momenti.
BRIGIDA 'N'autra adess! I vad a sarela subit la porta.
BARBAROT (tnendla) C'a s'pia guarda! Chila a j përdria sent lire.
BRIGIDA Sent lire! Coma?
BARBAROT Sala chi c'a son côi invitati ch'i speto? A son monssú Giachëtta e Paolin.
BRIGIDA Ma com'elo? Përchè c'a veno?
BARBAROT Savend che mi j'avia da vni sí...
BRIGIDA Ma coma a l'hanne fait a saveilo?
BARBAROT (ambrojà) Ah! eco... A m'han fame disné con lor. A j'era d'bareul, d'côl fiamengo... Ciaciara d'son, ciaciara d'lon...
BRIGIDA Chiel c'a l'è un ciaciaron a l'ha dit tut.
BARBAROT No, ma quasi. Ansomma a l'han pregame... cioè a l'è Giachëtta c'a l'ha pregame, përchè Paolin a volía nen... e a l'ha fait tant che mi j'eu dije ch'd'sí.
BRIGIDA E chiel a l'ha fait ben mal. Adess a fa 'l piasí a s'pia torna soa roba e a s'na va. Mi i saro la porta darè d'chiel e a j ven pi gnun.
BARBAROT Cospeto! che severità... Ma e le sent lire?
BRIGIDA Che sent lire?
BARBAROT Monssú Giachëtta, prevedent soe dificoltà, a m'ha dime ch'i diejssa che stamatin a l'avia prometuje doi mareng për fé 'na comission a la tota, ma che adess, s'a j lassava vni stasseira, a j'avria ofrijne sinq.
BRIGIDA I seu che le intenssion c'a l'han a son bône.
BARBAROT Bônissime...
BRIGIDA A l'è un boneur për la tota c'a s'fassa côl matrimoni.
BARBAROT Sicura.
BRIGIDA Mi tant i son già mandà via da sta cà... A lo sa c'a m'han mandame via?
BARBAROT A m'ha dimlo stamatin.
BRIGIDA I lo regreto pa... 'Na cà c'a s'fa quaresima tut l'an, c'a stento a paghé d'miserabil eut lire al meis, e che s'a va ben giugà, a momenti a trovran gnanca pi d'pan a credit.
BARBAROT Coma! A son a côla mira? Se madama a fa tant lusso.
BRIGIDA Sí, tut lon c'a guadagna monssú a va a fé luse la schina a madama, ma intant... Veullo ch'i j na conta una?
BARBAROT C'a conta, c'a conta sempre.
BRIGIDA Për podei andé al teatro stasseira, monssú a l'è stait obligà a 'ngagié soa mostra.
BARBAROT Da bôn?
BRIGIDA Da bôn da bôn. A l'avia pi nen un sold an sacocia. C'a nota che côla mostra a j'era pi cara che i seu pa cosa. A l'era 'na memoria d'so pare.
BARBAROT Oh! povr'om!
BRIGIDA A j'è côla povra tota c'a daria fina 'l so sang për podei rendje a so pare côla mostra.
BARBAROT A proposit: dov'ela adess la tota?
BRIGIDA A l'è d'd'là c'a fa andurmí 'l pcit.
BARBAROT A sarà mei avertila c'a i ven côi là.
BRIGIDA I seu pa coma fé. Stamatin a m'ha già strapassame.
BARBAROT I sento d'gent. A son lor.
BRIGIDA Mi i vad a saré e a buté 'l croch, për tut lon c'a peussa capité (via).