Vittorio Bersezio/Le miserie 'd monsú Travet/pàgina 30

Da Wikisource.
Le miserie 'd monsú Travet
Vittorio Bersezio
Artorn - La grafìa a l'é nen cola moderna ma cola dovrà dal Bersezio.

TERSS AT

La stanssa dël prim at. 'Na taula pronta për disné an mes. S'la taula 'na lucerna d'l'oton avisca.

Sena prima

Travet sta da 'na part c'a discor tut malinconich con Marianin; peui a so temp Madama da 'ndrinta e Brigida.

TRAVET Sí, Marianin, a l'ha fame pi pena lolí che tut cosa c'a m'è capitame fin adess. J'avia bsogn d'un po' d'sfogh, e i seu pa con chi piemlo che con ti.

MARIANIN (carëssandlo) Pover papà!

TRAVET Ma për carità! Disje pa gnente a mama.

MARIANIN C'a staga tranquil. Ma 'ntant c'a s'sagrina nen parei. Se chiel a j fa tanta pena separesse da côla mostra... e peui d'altronde a n'ha d'absogn chiel d'savei l'ora... a s'podrijlo nen arangesse ant quaich autra manera?... C'a senta, mi j'eu côla cros d'or e chi orcin' d'bon'anima d'mia mare. C'a fassa 'l piasí, c'a pia lolí e c'a vada a portelo al Mont d'Pietà për c'a j dago 'ndaré soa mostra.

TRAVET No, no, grassie... T'ses 'na brava fia.

MARIANIN C'a j aceta, brav! J'assicuro c'a m'fa dëspiasí disendme ch'd'no.

TRAVET Tente, tente toa roba, povra masnà... Da sí 'n poch i spero d'esse an posission d'riscatela... Però a l'è bel lolí da toa part. (A l'ambrassa) T'i veus ben ti a to pare?

MARIANIN A podrijlo dubitene?

TRAVET No, no, ma mi, povra fia, quaich volta i son ingiust con ti.

MARIANIN Oh! no, papà, cosa dislo?

TRAVET Cosa veustu? Ij maleur, le contrarietà, a m'irito quaich volta ch'i son gnanca pi mi. Ma i t'veui sempre ben l'istess, sastu, e i veui fé to boneur... Ven sí, scota, e rispondme franch: côl Paolin a t'piaslo?

MARIANIN (vërgognandse) Oh! papà.

TRAVET Rispond senssa sugession...

MARIANIN Ma... mi... i seu pa...

TRAVET J'eu capi: a t'pias nen.

MARIANIN (vivament) J'eu pa dit lon.

TRAVET Ah! no? Va ben, va ben: dunque i na parlërôma. Ma adess ocupômse un po' pi nen d'cose serie. Elo ancora nen pront sto bocon d'disné? Mi stamatin j'eu gnanca fait dejeuné, e adess i m'sento 'n aptit d'le masche. Guarda un po' cosa c'a fa Brigida, c'a buta ancor nen a taula.

MARIANIN A l'è d'd'là c'a giuta mama a fé toaleta.

TRAVET Santa passienssa! A l'è doi ore c'a j'è 'ntorn a la toaleta côla benedeta dona!

MARIANIN A j'è mach andaie via 'l pruché adess.

MADAMA TRAVET (da 'ndrinta) Presto! Bogié, core...

BRIGIDA (idem) Subit, madama (a seurt).

TRAVET Cosa j'elo? Andómne a taula?

BRIGIDA No sgnor. A l'è madama c'a veul ch'i porta ancora doi ciair.

TRAVET S'a n'ha già sinq o ses.

BRIGIDA A n'ha ancora nen pro. A veul agiontesse 'na fior an testa e a veul vëdse mei (a cor an cusina).

TRAVET Côl a l'è 'n afé sta toaleta! A j va an brando tuta la cà… Ma che odor d'brusà c'a j ven d'an cusina! (A Brigida c'a torna con doi candeile avische) Guardé c'a j'è quaicosa dël disné c'a brusa.

BRIGIDA J'eu pa temp adess. Madama a m'speta.

TRAVET Eh s'a l'è lon. I mangérôma ancora 'l disné brusà.

BRIGIDA C'a fassa 'l piasí, tota, c'a vada un po' chila a dé 'n'ociada al potagié (via ant la stanssa d'Madama).

TRAVET Sí, là, fa' un po' 'l piasi, va' ti un moment.

MARIANIN Subit! (Via).

MADAMA TRAVET (da 'ndrinta) Marianin! Marianin!

TRAVET Bon! Eco lí subit Rosa c'a la ciama.

MADAMA TRAVET (Criand anrabià) Marianin!

TRAVET A j'è nen. A l'è 'ndaita d'd'là un moment.

MADAMA TRAVET Mandla sí subit... Brigida, andela a ciamé voi... presto (Brigida fora).

TRAVET Cosa c'a veul adess?

BRIGIDA A veul butesse la vesta, e a l'ha paura che mi a tochela con mie man i j la sporca (via).

TRAVET Cosa! T'veus butete la vesta?

MADAMA TRAVET (da 'ndrinta) Eh! sicura.

TRAVET Speta dop disné.

MADAMA TRAVET 'N'autra adess! I fussne fola!... E ancora c'a j'è pa temp da perde.

TRAVET Euh euh! J'ôma tuti ij temp. (A fa për pié la mostra) Ah! i m'n'arcordo mai ch'i l'eu pi nen.

MADAMA TRAVET E côla Marianin venla o venla nen?

MARIANIN (c'a traversa la sena) I son sí, i son sí (via).

TRAVET Eh! là, passienssa! I n'ôma për 'n'autra bona mes ora a spëté.

CARLIN (da 'ndrinta) I veni andé d'co mi, í veui andé d'co mi.

MADAMA TRAVET (idem) Là! sëchme nen adess (Carlin a s'buta a pioré).

TRAVET 'N'autra pi bela adess! Carlo c'a pianta quaich grana.