Vittorio Bersezio/Le miserie 'd monsú Travet/pàgina 17

Le miserie 'd monsú Travet
Vittorio Bersezio

Artorn - La grafìa a l'é nen cola moderna ma cola dovrà dal Bersezio.

SCOND AT

'Na sala d'ufissi. Da 'na part 'na scrivania con un cancel antorn, c'a s'sara' vers 'l spetator, da l'autra 'na scrivania pi pcita dëscuverta. An mes d'la stanssa un taolin con un registr duvert ansima, piuma e caramal. 'Na stua avisca, d'scanssie al fond con d'carton, ecc. ecc.

Sena prima

Moton e Rusca.

Moton sta a caval d'na cadrega vsin a la stua e a les ij giornai an fumand. Rusca a ariva an pressa.

RUSCA J'elo ancora 'l liber? Ah sí! Meno male. (A va a scrivse, peui a s'gava'l paltò e 'l capel) I l'avia paura d'pi nen arivé a temp për scrivme. Nostr Cap d'session a l'è cosí pedante! E mi i lo mandria chiel a fesse scrive. Figurte, Moton, ch'i l'avia un rendez-vous për stamatin e ch'j' eu dovú tajé curt për core prest a l'ufissi... Oh! l'ufissi a l'è una piaga social! Vni sí a petrifichesse tut l'an për doi miserabij mila lire. Asto veuja d'travajé ti?

MOTON Mi?... Peuh!... e ti?

RUSCA Peuh! (A pia 'na cadrega e va a stesse d'co chiel vsin a la stua) Cosa j'elo d'neuv sui giornai d'stamatin?

MOTON Niente... I lësia j'anonssi.

RUSCA A l'è la part pi amusanta. Asto 'na sigala da deme?

MOTON Te'!

RUSCA Grassie (a l'avisca).

MOTON 'L giornal a dis che 'l Teatro Regio a val niente.

RUSCA A l'ha pa tort. Sesstu ancora nen staje?

MOTON Mi no. A la seira andôma sempre 'na partia a fé doi bôte a taroch.

RUSCA Mi i son aboname. Ma a l'è pa për 'l spetacol. A j'è 'na balarinota d'la scola che mi i protegio... con d'aplausi.

MOTON A t'costa nen motoben.

RUSCA J'eu già regalaje un sonet fait da mi e doi pachet d'caramele.

MOTON (riand) E chila?

RUSCA Ciuto. Scandalisôma nen monssú Travet.

MOTON Për adess la gravità d'monssú Travet a peul nen esse compromessa. A l'è ancora nen vnú.

RUSCA Cosa! A l'è ancora nen vnú a st'ora? Monssú Travet 'l model d'l'esatëssa! (A va a guardé da d'sora 'l cancel) Propi! A bsogna ch'a j sia capitaje quaicosa d'serio: j'eu paura c'a l'abia avú n'assident.

MOTON A l'è forse la prima volta an soa vita c'a tarda. J'era giusta vnú a sèrchelo për felo firmé a 'na sotoscrission.

RUSCA Ah! la mia. Côla për fé litografé 'l ritrat dël Ministr.

MOTON No, no, la mia.

RUSCA La toa! Che sotoscrission astu butà an camin ti?

MOTON Për regaleje 'na cros al Cap d'session c'a l'han fait cavajer.

RUSCA Ah! grinta' ch't'ses! T'veus butete an grassia d'côl mincion...

MOTON Parla pian c'a l'è lí d'd'là.

RUSCA E fete dé la gratificassion c'a t'ven nen.

MOTON Sent: a l'è a peu prè 'na cosa parei d'toa idea d'fé stampé 'l ritrat dël Ministr.

RUSCA Là, là, dômsse la man. Ti t'l'as sotoscritt a la mia, e mi i sotoscrivreu a la toa.