Vinèis Minòt/Coj dij Bali Bianchi

Artorn

---

Coj dij Bali Bianchi

Stamatin su 'n vej papé
treuvo fòto 'd gioventura
con lë specc fé 'l paragon,
lo dirìa 'dcò questura,
arconoss-se l'é malfé.
Perde guèra... che magon!

Carià 'd giòbia 'dcò j'amis
l'un l'àutr is doma coragi
c'lassé sté sarìa darmagi:
ma a la larga da lë mnis
ch'a passa an matinà
l'archeuita diferensià.

Drit 'me 'd fus foma ij merlòt
con st'andi da cascamòrt
a le fijëtte foma reu
(violëtte 'n mes le ortìe)
"Bali Bianchi" 'n ciamo svenss,
noi che sensa 'l bonbon bleu
i-j farìo dësblé ij sens
i-j farìo vëdde le strie.

Ma 'n toca calé giù dal pruss
për nen fé figura 'd marluss
e fé 'l fil a na mesa stop
ch'a në sganfa dal moro 'l top,
copà a la bela stagion
con barbera sincer e bon.