Vinèis Minòt/Al Café Mulassan

Artorn

---

Al Café Mulassan

Sota ij pòrti ‘d piassa Castel
i son pijame st’andi da fagnan
vardo con n’aria da barivel
passé ‘l mond dal Cafè Mulassan.

Stërmà dëdré a mè biceròt
im susto ‘l përfum d’ës vin novel
obliand ëd la vita e ‘d sò fardel:
l’ùnich sagrin a son j’agnolòt!

Davzin ëd totin-e a fan salòt;
un pàira 'd fieuj, luv vestì d’agnel,
bèich da sassin, a gonfio ‘l cassiòt:
bërlico làver... ciamo pontel.

Ma peui j’euj am dròco s’un giornal
ch’am dis che ‘l mond a va a rabel,
che dòp l'oral j’é pì d’arcancel.
Contacc, a m’ha ruvinà l’interval!

Ma mi campo st’aria da monsù
për pa pensé a ‘s destin fotù,
E mi ‘m pijo st’andi da fagnan:
vardo ‘d gent al Cafè Mulassan.

Minòt Vinèis 2008