Tòni Bodrìe/La Brigada Regin-a

Da Wikisource.

Artorn


La Brigada Regin-a[modifiché]

La pì bela e la pì anciarmanta dle lìriche patriòtiche ‘d tuta la literatura piemontèisa, costa-sì che na pitura dël Bòssoli a l’ha ispiraje a Barba Tòni. A la vista dla pintura dla Brigada Regin-a ch’a part për la guèra, ël Poeta a vorërìa che ij giovo piemontèis as butèisso torna an tren: ant ël nòm ëd tuti ij nòsti Vej ch’a son mòrt për la libertà (anganà, për la fàussa libertà), fene n’àutra e liberé ‘l Piemont da le caden-e.

Cand mi i vëddo la Brigada Regin-a;
la Ren(-)a sensa gen(-)a, a-j disìo,
dël Carlin Bòssoli, am ësmija,
un dij ciadeuvra fiamengh ëd la pintura
‘d tùit ij temp.
Cand mi i vëddo la Brigada Regin-a
ij mè euj a son tut ëd mè cheur,
a pioro tùit ij mè pior.
Cand mi i vëddo la Brigada Regin-a
am ësmija ‘d vëdde ij mè grand,
tùi: ij bon, ij grand, ij bongrand
a parte për la campagna:
osej e biaj e canson,
la Lionòta, ël Capitani ‘d Salusse,
ël Baron Litron,
a parte për la campagna,
për la campagna dla mòrt.
Al pòst ëd la drugia benèita 1
a van a fé bela la campagna
con ij sò còrp, ij mè grand.
Ëd la Brigada Regin-a.
Cand i vëddo la Brigada Regin-a
a parte për ël “camp” (o- sant-o)
am ësmija ‘d vëdde ij màrtur
ch’a-j giuto na man al bòja
ch’a fasa bin sò travaj,
San Lorens ch’a-j dis: «Virme pura,
da sì i son giò rumatà».
Cand i vëddo la Brigada Regin-a
con col pass, con col andi dl’àut’ mond
d’andé an glòria (a l’àut’ mond),
coma tanti Artaban contra Roma,
e tùit ij pogeuj, lòbie, bàutie
dle bele fomne ‘d Turin,
ah Turin Turin,
ch’a crijo, pioro, saluto,
i pioro tùit ij mè pior.
A va la Brigada Regin-a
për la libertà (?) a la mòrt.
A chërdìa, la Brigada Regin-a.
A l’é andàita, la Brigada Regin-a,
e a lo savìa nen, pòvra Ren-a,
la Ren-a con tanta pen-a
ëd nen fé pro bin sò dovèj,
për la mòrt ëd la libertà,
ch’a l’é toa mòrt, nòst Piemont.
Cand mi i vëddo la Brigada Regin-a
i vorerìa arviscolela,
fela torna, fene n’àutra,
për toa libertà, nòst Piemont.

Musicalbrandé n. 78 | Giugn dël 1978]