Tòni Bodrìe/Al mënno a-j pias

Artorn

AL MËNNO A-J PIAS...

Al mënno a-j pias la fomna, al taboj a-j pias l’òm,
chila un pò bon-adòna e chiel un pò bonòm.
Chi a-j veul bin a soa gata, a-j veul bin a soa mata,
na blëssa ch’a lo arpata.
Che mai Grafin a geuga con ël giari e ’l ratin?
a sarà ch’a l’é pin;
ma pì che tut an mostra coma ch’a fà la Mòrt
con minca creadura viventa: a geuga fòrt,
chè ’l geugh a l’é la vita,
tuta un geu con la Mòrt; e pì l’é bàuda e drita
pì ’l geugh a l’é genit, la vita a l’é genita.
Bin as sulìo ij simon ij bej barbis e as diso
daspërchièj lòn ch’a viso:
«Ànima mea latin-a a son ij mè barbis,
tut nerv, sëntor, sëntense; s’am na dan ij mè amis,
ànima mea na mea d’arpat, barbis ëd gat»;
e Bagat a ven mat:
peur-lo ciapé ’d cristian? a peul ciapé dij rat.
Ij geu tut braj e ruse, sens’alegrìa ch’a rija,
a son na maladìa, la folìa pì falìa.
Giughé mach për vagné l’é ’l pì marì giughé,
lì che ’l diav as dësmora;
preuva a giughé da sol, con toe bes-ce e ij tò cit,
con can e gat, sòn sé
ch’a l’é ’n giughé ch’amusa, ch’a-i vòla ’l temp e l’ora,
geu genit, tut arbit.
Coma torné masnà e intré ’nt ël règn dij cej?
Fé torna ij geu masnà. mach ij pì brav e bej,
mej: con neuste masnà, për savèj perde mej,
fé che ’l geu sia tut un con ël rusch e la vita,
sent-se già ’nt l’àuta reusa, ant l’eterna margarita.
I seve col ch’a l’é ’l pì bel, ël mej dij tegn1?
Col ch’a l’ha dane Chiel, ël Rè dij rè: sò règn.

1) tegn = apontament.

Da "Ij Brandé" (2015).