Tòni Bodrìe/Ah ramin-e

Da Wikisource.

Artorn a la Tàula


AH RAMIN-E...[modifiché]


Ah ramin-e d'aram lusente al sol,
cand as aussava i na sbrinciavi ij raj
për tute stansie, coma le paloche.
E coma a vnisìa bon-a la mangé
da 'ndrinta a vòsta lus . Na òta al mèis
mama av lavava con l'asil e al sol
av butava a suvé. Seve partìe
col marì di ch'a v'ha pijà la guèra.
Dnans dij soldà, bailà da vòsta lus.
A l'é restaje, ambajà, òh, vòst'ombra
là sla muraja; l'ombra dël boneur.
An ti, mama, a-i nassìa na vita neuva.
Përparèj an ti, Tèra, 'l mòrt a treuva
la vita neuva.
Ant le tombe dle balme tut l'invern,
là onda ij brich a fan da pilie al cel,
a deurmo tanti frej. Peui a-j dësvija:
"tové tové tové" tò bioch ò prima,
coma al giudissi universal: "Alé,
alé a vita neuva".
Bin për lòn, Israel, ij tò bongrand
as fasìo sotëré ant la balma 'd Mambre.
Con ij tesòr dël Lìber. E ij campion,
ij civalé crosà, 'n tra na bataja
e l'àutra a l'han sërcaje. E a l'han sërcà
ël quint Vangeli. E a l'han pa mai trovalo.
Ël quint Vangeli e 'l sest e 'l sétim, nèh
a l'han falo ij tò Sant ò Gesia Santa.
Ma ij fieuj ëd l'Alp a son massasse an guèra,
ij frej ëd l'Alp: alman, ladin, lombard,
gavòt, viton e bogianen; ahiDé.
Për ël magon a l'é mòrta soa mare,
l'Alp a l'é mòrta.
A dësoneur a speto le mongiòje
ch'a torno an àut bërgé e pelegrin:
l'Alp a l'é mòrta.
Ondes ore: për l'Alp, an sla valada
a taco a volé j'àure, a vòlo, a vòlo,
findi a quatr ore apresmesdì. Marenda.
As na torno ant le balme dl'àuter mond.
Àure? le porcission dij fieuj ëd l'Alp,
l'Alp ch'a l'é mòrta.