Silvio Bellezza/Ij nòsti doman

Artorn

---

Ij nòsti doman

An sla sàgoma bianca
ëd coste montagne
la lus dla matin
a smija esitanta
e gnanca 'l vent
l'é pa pì bon
d'arpeti j'auguri.

Regem venturum dominum...
ma 'n còlp ëd fusil a fùlmina 'l cél
e la paròla 's sangh scrita an s'na piassa
ël temp l'ha fërmà.
La frase strompà ant la gola dij mòrt
e la man armà 'd chi l'ha colpì
podoma posé ant ël presepio
andoa a-i é pì nen pòst
për remagi e comëtte.
Ma avèj 'l coragi 'd përdoné
l'é sentì na neuva 'd pas
për ij nòstri doman.