Silvio Bellezza/An Montagna

Artorn

---

An montagna

S'ënginoja 'l dì
a j'orassion dle ciòche
e svaniss ël profil
dle nòstre montagne.
As pòsa an dij branch
l'arzigneul dël vent
e la neuit lo scota
antan ch'a cor an sij cop
con ij cavaj dla lun-a.

Peui quandi tut a l'é chet
a mach pì le sivìtole
a brajo ij sagrin,
a smija 'd sente 'l silensi
ch'a scurpiss le stèile
ant ël marmo dël cél
e 'n rijan ch'a ciaciara
con ij bòsch andurmì.