Sergio Notario/Ël pòrta-signal e 'l lavavéder
Ël pòrta-signal e 'l lavavéder...[modifiché]
A-i é ël feu ross an sël pòrta-signal,
bin fòrt mi i sgnaco dël fren ël pedal.
Davzin la vitura, un mòro povrass,
a ven con d’eva e un bocion fàit dë strass.
E lì, an sël canton ëd Piassa d’Arme,
con sò strass tut bin ambibì ëd lerme,
chiel ël véder a lava, sto pòvr faseul,
con tanta passiensa, ma coma ch’a peul.
Pòvr òm, am fà pen-a, a l’è angossà,
feura e drinta chiel a l’é tabussà.
Con bel deuit e un ciau, n’euro i-j dago mi
a col moro da bèro, ‘l mòro sburdì.
Antan che mi im ancamin-o pian pian...
Fable!...A sarà bin miscredent e pagan!
Ma...a l’amprovista am dis: “Grassie monsù!!!”
Mej ëd coj che sì a l’han sempe vivù.