Sergio Gondolo/L'amor ësfaussà

Artorn

---

L'amor ësfaussà

Varda ben dantorn, cudiss ben ël boneur,
a venta sempe avèj quaidun da speté,
prima e dòp le fatighe fèite con ël cheur.

Varda nen ël temp, mostra nen l’età;
ij sospir e jë svard a passo dëstacà
ma i pensé nò, an sj’ale dla fantasìa
minca tant a rasono për savèj la vrità,
për conòsse l’alba e dësmentié la sèira.

Varda nen la gent, mostra nen l’intimità;
prima che drinta ’d ti a cala la scurità,
a scapa, a spariss dal patele, a vòla via
e minca tant a scota la vos ëd la dignità,
për nen torné a j’afann ëd na vita scura.

Varda nen ij nisson, denonsia ’l baston,
a venta sempe avèj n’avnì da spende
prima e dòp che l’amor a perda la rason.

Sergio Gondolo