Sergio Gondolo/Dle vòte

Da Wikisource.

Artorn


Dle vòte...[modifiché]

Dle vòte i vad për na via sicura,
an mes a la realtà e la fantasìa .
Sì a bass a-i manca l’ànima pura,
bej pensé e na vera nostalgìa.

Euj stupì drinta a nìvole bianche,
cel sospèis lontan da le convinsion.
Vite passaroje, dëvòte, strache
e dëscoste dal chërde për devossion.

L’indiferensa l’ha crasà la tèra,
con l’ambission ëd porté modernità.
ël sens dël vive ’nsema a piora
e cost lusor d’euj a ciama lealtà.
I veuj bandoneme ’n sl’onda giusta
arcordeme d’un silensi d’emossion.

Ma la speransa ’m resta dëscòsta,
spalia e sempe sla stra dël përdon.
Dle vòte a basta ’n gest d’atension,
ël sërché soliev ant un sincer basin.

Dle vòte bzògna chërde a le passion
e sensa tiré ’l fià, speré ’nt ël destin.