Rino Serra/Tre grassie 'd Poirin

Artorn

---

Tre grassie 'd Poirin

I

Poesia, pitura e scultura
A Poirin as na fà na coltura:

Dal setsent ël bon Bosco Gustin
A scrivìa ‘n Piemontèis a Poirin,
A scrivìa dij nòsti difet
Dle magagne e quàiche segret;

L’era pa ‘nt lë scrive tròp fin
Ma – disìa “pan al pan, vin al vin”
L’era fàit ëd pasta sincera
A disìa pròpi tut com a l’era.

Ant ël moro a bèicava pa gnun
E ‘d paròle mai stasìa a digiun
Ëdcò ‘l Papa cand sì l’é passà
Da Gustin a l’é stàit bin ciadlà.

A scrivìa ‘l bon Gusto ‘d Poirin
A scrivìa da sèira a matin,
Piemontèis - Italian fà pa nen
A scrivìa për sentisse pì ben;

Poesia, pitura e scultura
A Poirin a l’é n’arte ch’a dura.

II

Poesia, pitura e scultura
A Poirin as na fà na coltura:

I l’oma un grand òm an pitura
Ch’a l’é stà bon magister an color,
Ël disegn l’era ‘n soa natura
E ij sò quàder ancheu vivo ancor;

Grand Gaidan it ses ël vant ëd Poirin
Tòi disegn a son ël nòst onor
Chi ancor a-j ‘ha ‘n ca jë strenz bin
E se a-j lassa ‘nt ël cheur che dolor.

Ver magister tra l’eut e ‘l neuvsent
Tò penel piturava ij reaj,
Dla pitura it j’eri un portent
E a ti ‘ntorn a j’ero pa eguaj.

III

Poesia, pitura e scultura
A Poirin as na fà na coltura:

L’é Stuardi scultor ëd la Madòna
Dla Madòna pì ‘n àut che a-i sìa,
L’é Stuardi la vera colòna
Dla scultura dl’eutsent pì ardìa.

Sò ingegn da la tèra ‘d Poirin
L’é spantiasse d’antorn a ragera,
Sò travaj l’era giust fàit da bin
Con la grassia e an bela manera;

Sìa col bronz che col marmo o col giss
Le soe man minca còsa a modlavo
E a vardé ij sò travaj as capiss
La grand blëssa che a tuti a donavo.

La Madòna lassù al Rociamlon
Con sòj euj sovrastand la pianura
A-j dis grassie a Stuardi dabon
Mentre tuti an protegg con gran cura.

Poesia, pitura e scultura
A Poirin a l’é n’arte ch’a dura!