Rino Serra/Le fior dël mal/083

Baudelaire, Le fior dël mal

LXXXIII. L'eautontimorumenos

(Chi ch'as castija da sol)

Sensa flin-a 't fraperai
E sensa ghignon, mé 'n maslé,
Coma la rochera Mosé!
E da toa parpèila i farai,

Doa mè Sahara as borerà,
Sbrincé eve dla soferensa.
Mia anvìa gonfia dë speransa
Su toe lerme salà a noerà

Mé un vassel che 'l largh va pijand
E 'l mè bon cheur anciocà
Dij tò car sangiut arsonrà
Mé 'n tamborn che la cària sta dand!

I sarai pa 'n fàuss acòrd
Ant la divin-a sinfonìa,
Grassie a l'angorda ironìa
Ch'am sopata e ch'am mòrd?

L'é 'nt mia vos, cola ch'a crija!
L'é tut mè sangh col nèir velen!
Mi i son ël sinistr specc, doa ven
Sempe a specesse la strìa!

Piaga e cotel mi i son, va bin?
Mi i son lë sgiaf e la gioa!
Mi i son ij mèmber e la roa
E la vitima e 'l lagosin!

Dël mè cheur ël vampir mi i son,
-Un ëd coj grand abandonà
Al rije etern condanà,
Ch'a peudo pì rije da bon!