Rino Serra/Le fior dël mal/053
LIII. Invìt al viagi
[modifiché]Mia cita, mia seur,
Pensa a la dosseur
D'andé a vive lagiù mi e ti!
An libertà amé
Meuire e amé
Ant ël pais ch'a të smija 'd pì!
Ij soj inumidì
Da cej antorbidì
Për mè spirit l'anciarm a uso
Misterios ancor
Dij tò euj traditor,
Che travers le lerme a luso.
Là, tut l'é blëssa e ardriss,
Calma, piasì 'dcò spatuss.
Mòbij lucidà, Da j'ani solià,
Nòsta stansa soagnerìo;
Le pì ràire fior
A mës-cio j'odor
Con l'ambra vagh sentor avrìo,
Ij bej rich plafon
Jë specc bin përfond
Ël rich splendrìor oriental,
Tut a parlerìa A l'ànima mia
An soa dossa lenga natal.
Là, tut l'é blëssa e ardriss,
Calma, piasì 'dcò spatuss.
Vëdd, dzor coj canaj
Deurme ij vassej
Andoa l'umur l'é vagabond;
L'é për sodisfé
Tò desideré
Ch'a ven-o là d'an cap al mond.
-Ij soj cascant
Rivesto ij camp,
Ij canaj, l'intera sità,
Ëd ross brun e òr;
Ël mond s'andeurm aor
Ant un-a lus bin afoà.
Là, tut l'é blëssa e ardriss,
Calma, piasì 'dcò spatuss.