Rino Serra/Colin-a 'd Moncalé

Artorn

---

Colin-a 'd Moncalé

La polenta
Dla lun-a stassèira
Fà babòja
Fra ij bòsch dla colin-a.
Pian pianin
Dal fond ëd la pian-a
Chila a s'àussa
E sovrasta 'l castel...
Che spetàcol!
La lun-a stassèira
Së specia...
E fà 'l bagn ant ël Pò.
Mi quand vëddo
Costa lun-a 'n sël còl
Là 'n fra mes
Ël castel e 'l cioché...
La mia vita
Diventa 'n bel seugn;
Vorrìa pa pì
Dovejme dësvijé.
Moncalé che
Fra pian-a e colin-a
It ses un seugn
Ëd la mia gioventù,
Quand maraje
I tajavo da scòla
E con gorbëtte
S'amboscavo al castel.
L'é passaje
Un mugg ëd temp da col di,
L'é passaje
Tanta eva 'nt ël Pò;
Ma 'nt le sèire
Che la lun-a 't ris-ciàira,
Mi am sento
Torna 'rnasse parèj.
Oh Moncalé
Mè vej seugn ëd gioventù...
Quand la lun-a
T'ambrassa la sèira
Mi vorrìa...
Ancor trovème lassù!

28 Novèmber 1982