Renzo Brero/Matin seren-a e bela

Artorn a la Tàula

---

Matin seren-a e bela

Ò matin seren-a e bela
dla mia vita pi nossenta,
come it j’ere barivela (1),
tuta ant l’anima contenta!

Mach che ‘l sol lusèissa (2) an cel,
che na rama ant le campagne
a butèissa un but novel,
për ij camp e le caussagne (3)

mi corìa come un fòl!
Sensa fren, an brass al vent
ch’am foetava (4) facia e còl,
sota ‘l sol d’istà lusent

quante veuje, òh, quante veuje,
ch’im sentìa an drinta a mi,
sensa mai podèije cheuje!…
E mi anlora a core ‘d pì

për ij camp e le caussagne,
sensa pen-e, ‘l cheur content,
tra le fior ëd le campagne,
come un fòl, an brass al vent!

= Glossari

• 1 Barivel: burlone; Barivela: ragazza leggera
• 2 Luse: luccicare
• 3 Caussagna: passaggio alla testata dei filari delle viti o al margine dei campi
• 4 Foaté: sferzare