Renzo Brero/Còsa ch'it pense
Còsa ch'it pense
[modifiché]China su tò travaj mentre ch’it cuse,
còsa ch’it pense, ò bela mia gognina,
còsa ch’it l’has, ch’it vëddo j’euj a luse
e ’l facin anfiamesse na frisina?
Forse d’ ricòrd tròp viv as dàn da man,
forse na vos it sente an ti ch’at veul:
d’ nuvole scure a passo e van lontan,
ricòrd ch’a scianco e at bato ’l cheur an deul?
I tò dilin a coro, as dàn da fé
tacà a na vesta bianca da sposina,
a coro e as dàn d’apres i tò pensé,
testina bela, bionda e rissolina.
Còsa chit l’has, ch’it vëddo j’euj a luse,
china su tò travaj mentre ch’it cuse?
Da «A Mistral» 1930