Remo Bertodatti/Ij pra dl'infansia

Ij pra dl'infansia

... Beivìa 'l bleu dël cél
e mila bon odor am arpatavo...

Sautava ant j'onde vërde dij tërfoj
anté le mape rosse
j'ero l'arbat dij cop ëd mè pais...
Corìa tut ël dì parèj d'un mat:
la testa 'nt jë scarboj dla nivoren-a
e ij brass duvert com ale
... ale 'd farfale.

Per premi dontè gambe 'd panbrus-cèt...
A-i era ant ël sò giuss
na sòrta d'un piasì ch'am anciocava!

Oh! Gòj dij pé patào sla tèra amìa
.....
La tèra amìa
ch'l'é mai pì stàita mia:
(ventura o bzògna?)
a l'han portame 'nte ch'as dis ch'as vagna...

Lassé ch'i seugna...
Lassé che për n'istant tut lòn ch'am greva
lo pòsa an brova al fòss, com vesta 'd bissa,
e i torna 'nt ij tërfeuj dij pra dl'infansia:
lìber ëd cimpé 'l cél!...