Remigio Bertolino/Mistà dla sèira

Artorn

Mistà dla sèira

A gatipòla dla sèira, mistà
ëd lampio da reu spalì co 'l fujage
sombr, vindo lë specc ëd l'eva sfrisà.
Ëd chi costi pass sla giàira d'un viage

ch'an chita angossà 'n passandne rambà
con soa ombra? Son përdù, 'd ciòche passage,
lòsne 'n gole giassà, feuje crivlà
da j'onge dël vent. Lassene 'n message

ànima ch'i frisson-e con la lus
tajussà da ste man afrose 'd piante,
smarelé na paròla ch'a bërlus;
sl'eve tramolante l'ària a sofié
a së sgola e noi sl'orlo sporzù tante
vire tentoma: a s-ciairì mai rivé.