Remigio Bertolino/Ij bru

Ij bru

J'é pì 'd fornèj për ij bru:
adasi stenzo 'nt ij brass ëd le ronze.
Vacio 'l cél, a s-cianch,
tra ij branch dij castagné.
'S visco mach pì
ëd na rajà 'd brasa al tramont
o dë stisse 'd sangh ëd lun-e
frìe sij gòrgh ëd le ronze.
Con j'euj spantià
ënt j'onde dl'erba-barca
artisso un sofi 'd vos
dij nòstri vej.

Chiej arvivo 'n coste fio'
che tacavo a sëcché al lòbie
e guernavo për visché 'l feu:
um feu përfumà ch'a nassava
dal creus ëd la tèra
e s-ciopatand lasdava
dré dal pòrte frojà
j'ombre candie dl'invern.