Remigio Bermond/La sëmna a l'é fasse pianta

Da Wikisource.
Jump to navigation Jump to search

Artorn a la tàula


La sëmna a l'é fasse pianta[modifiché]

Për la campagna as n’andasìa
sola, la pas
ciamand d’esse cuija
da man generose.
Gnun a l’ha slongaje ij brass...
L’hai ancontrala
sla lèja ansugnichìa
tra piante ombrose
veje coma ’l mond.
A portava un fass
ëd lun-a pien-a
e la certëssa che la sëmna
ëd làcrime
a l’era fasse pianta,
robusta e drùa.
Son vist-me òm,
ant la neuit seren-a.
Mè cheur
brusava ’d passion
e ’d contentëssa.
Ma j’era sol...