Regina Giordano/Libertà

Artorn

---

Libertà

In America, prima 'd sposesse,
Për fesse quat sòld, mè nono,
A l'avìa provà d'andé,
Ma impossibil ëd resté:
Ant la min-a a pod'ìa nen respiré,
Preferìa ant el Piemont ritorné,
Për tribulé, ma nufié l'aria pura
Dij "Montagnin" e gode 'd Sangon la frescura;
An fàbrica e 'nt la sità,
A vòrìa nen andé,
Pitòst tajé bòsch e ronze, vive 'n campagna,
Travajé a l'aria libera!
An la primavera 'd 1923,
An Franssa mè nono, a l'ha pensà d'andé,
Esploré na contrà tuta 'd pianura,
Tra doi fium ëd grand misura;
Un Piemontèis a l'é andait a trové,
Per avèj un contrat për travajé,
A vorìa nen fé ël masoé.
Con quàich sòld, tanta sudor e volontà,
Na cita cassin-a a l'ha comprà,
Për vive in libertà,
Tra bòsch, camp e pra.