Pio Ferrero/Cita lus

Cita lus

Ant la neuit così scura da fé por
fin-a 'l pì cit lumin an dà 'n pò 'd vita
a l'é come n'arfugi che m'anvita
për arposeme e dësmentié 'l dolor.

L'é mach na lusentela cita cita,
pogià 'nsima lë vlù, còti, 'd na fior;
spòrzo mie man për deje 'n pò 'd calor
ma, al pòst, më smija d'arsèive 'n sòfi 'd vita.

Quandi l'é tut silensi antorn a mi
o 'nt ël trafen dla lota pë'l vantagi,
a l'é na gòj savèjla sèmpre lì:

soa lus amìa am giuta e am dà coragi
për seguité mè vive dì për dì,
pì sclin-a antant che as fà pì dur mè viagi.