Pinin Pacòt/Priap
Priap
[modifiché]A Olivero
Hunc lucum tibi dedico consecroque, Priape...
Catullus
Bon dé Priàp da le frev dl’istà,
tut galarù va svantajand la cova;
con lë spervëzzo ant j’òss a fa la rova
sicur dla gòi che chiel a cujirà,
e peui as cogia ai pé dla bussonà.
Mòla molzina, china su la brova,
reusa novela ch’a së slarga e a crova
lo anlupa ant na cascada profumà.
Reusa novela che ’d piasì as dësfeuja
versand la copa piena dle soe veuje,
ch’a rubato pian pian feuja per feuja,
antant che ’l dé, con j’euj avisch ch’aj rijo,
a pòsa i làver su ’n bochin da cheuje.
E le bergere, ahidé, s’a scapo e a crijo!
Da Crosiere 1935