Pinin Pacòt/Gioventù pòvra amija

Da Wikisource.
Jump to navigation Jump to search

Pinin Pacòt


Gioventù pòvra amija[modifiché]

Gioventù, pòvra amija,
finìa
l’é sa giornà rijenta
ch’a l’ha fate contenta,

e cost sol ch’a tramonta
a pronta
n’autra bela giornà
për d’autri annamorà.

Ma, për noi doi, la seira
s’fa neira
e a slarga ij brass dë vlù
për cheujne, ò gioventù;

e noi ch’i soridoma
i l’oma
un cit frisson sutil
drinta lë sguard tranquil.