Pàul Castlin-a/Fongà ant la pàuta
Fongà ant la pàuta
[modifiché]Saré j'euj. Dëstissé la tele. Fé tase 'l "memento mori" (arcòrd-te ch'it l'has da meuire) dij cantor ëd la catàstrofe. Lassé pa che le vos siblante dla propaganda terapèutica av trapan-o 'l crànio e ch'as piasso abusiv an vòstr servel. Imaginé, mach për un pò, ch'iv dësvije ant un pais "democratich" anté che 'l parlament a l'ha finì për esse mach na formalità e ch'a l'ha pì gnun podèj. Anté che ij partì as pijo për ij cavèj mach për ròbe d'importansa scarsa. Anté che 'l president dël consèj a l'han daje tùit ij podèj e ch'a sìa 'n rapresentant ëd pèis ëd la finansa internassional. Anté che la magistratura a daga pa 'd segn ëd vita e ch'a sìo demonisà 'd manera sistemàtica coj ch'a la penso divers dal govern. Un pais anté ch'a l'han proibì con ëd scuse minca 'n corteo e anté che le guardie a craso minca na fòrma ëd dissension pacìfica. Imaginé 'd vive ant un moment ëd la stòria anté che i média a son sogetà a 'n sol banché ch'a comanda. Anté che na part ëd la popolassion ch'a veul nen pijé na certa meisin-a a sìa ghetisà e sogetà a la gògna pùblica. Pensé mach che ant un contest parèj, ij vòstri drit a dvento 'd concession ch'a peudo esse revocà, che vòstra esistensa antrega a sìa regolà da 'n salvacondot ch'av renda la vìta inpossibil, ch'a sìa an vigor në stat d'emergensa artifissiosa e contìnua ch'a ven da na crìsi sanitària infinìa (e d'àutre as na trovran sèmper). Se mach i pense a tut sossì, s'iv trovèisse fongà ant la pàuta, s'i fusse ciapà da costa carcavèja, credrìene përdabon che tut a fussa "a pòst" e che lolì a sìa për ël bin ëd vojàutri? Avrìene tant la vista curta da chërde 'd vive "an democrassìa"?