Ottavio Levo/Na figurin-a 'd quarant'ani fa

Artorn

---

Na figurin-a 'd quarant'ani fa

Surtìo da scòla tuti contegnos,
le magistre amonìo:
«Bimbi composti!».
Pen-a girà ’l canton, giù cartelade
e pugn e crij,
e peui tuti a fissé,
ferm an sël canton, l’òmo dël «gnacio».
La bici ’d vint chilo
pogià a la muraja,
con ël tond montà davanti, pien ëd profum,
fumant, anvitant, e noi, pòvra maraja,
a riguardé col doss, fàit ëd castagne,
coma s’a fussa
ël doss pì bon dël mond.
«Doi sòld a mi!»; «Quatr sòld a mi!».
Chiel a tajava,
chi a lo comprava
as lo trovava ’n man, càud, sòlid,
ma ’l pì bel
l’era la gionta:
col tochetin che con deuit at porzìa,
giontand a la rassion
ël tòch pì bon!