Mario Pich/Òmini 'd giss

Artorn

---

Òmini 'd giss

Ant ël cel grev
a vòlo, rasent ai cop,
róndole servaje.

Feu dëstiss,
póver ëd sënner
e arcòrd a biàuto
fra le ringhere.

Arlongh le stra
e sota ij pòrti,
òmini 'd giss
a arserco ànime përdùe.

Mè sërvel a l'é 'd paja,
mè cheur un përtus
ant la bianca muraja;
lì ëdnans
na fomna a crija,
ma gnun a scota
e gnun a veul savèj
se a sìa la mòrt
o, bon për noi, la vita.