Marie Thérese Pillone/La libertà

Da Wikisource.
Jump to navigation Jump to search

Artorn


La libertà[modifiché]

Bela masnà,
it l’has ciamame stamatin,
l’esat color ëd la Libertà.
mè car citin,
ant ël mond gnun pitor
L’ha mai andvinà
sò ver color.
Libertà, veul dì gòde la natura,
core për bòsch e pra,
vive a l’aria pura,
bagnesse ij pé ’nt la rosà.
E peui podèj sugné an pas.
Nò! La Libertà l’ha pa un color precis,
ma esist ant ël soris,
dij Tò Car,
ant la fiusa ’d Dé
e an cola dij Tò amis.
Libertà, l’é vardé na feuja volé,
opura vëdde le nìvole a galopé
sota la furia dël vent
e sente ’l tron bërboté.
Nen avèj paura citin!
Mai!
Përchè tut lòn ch’as ciama Libertà,
as pitura pa.