Luigi Vaira/La procession ant ij dì dël virus

Artorn

---

La procession ant ij dì dël virus

Gnun bordel, gnun-e canson,
mach ël meusi ciusioné dla gent
ch’a veul vardé la procession
combin ch’i sio an cost moment
obligà a nen sté tròp davzin,
distant almeno tre o quatr pass,
ma nòstre vos ch’a diso ’l Bin
an gropo tuti an cost ambrass.
An fan cò efet coj eut amis
già colatà a portela sla schin-a
ch’a son cò lor për ël pais
a speté la Madòna ch’as avzin-a,
con chila pòchi òm dnans e dré:
a-i é tre prèive, con la vesta bianca
tre guardie, ël vice-sìndich e ’n carabinié
mentre che tuta l’àutra gent a manca;
peui còsa dì ’d col vir longh... ëstran
miraco, profitand dël tamagnon
as peul porté la statua pì lontan
anté ch’a passa mai sta procession
e nòstra fé a smija fin-a pì sincera
adess che ’dnans a costa maladìa,
për ciamé na grassia, e dì preghiera,
an ven d’amblé... l’Ave Maria.