Luigi Ceresa/In silensi

Da Wikisource.

Artorn


In silensi[modifiché]

In silensi, sotvos,
dovrenda na pòrta
giamò sbaratà
su la ponta dij pé
denta dë mi
tit sè infrognà...
In silensi, sotvos,
sforsanda na pòrta
ch’i sevi sarà,
su la ponta dij ali
’mè na parpaja
lontan ti sè volà...
In silensi,
dë nascondôn
ti sè scapà
sensa fàm sentì
ël trôn d’on uss
ch’a sbata...
Int ël silensi
as senta gnanca pu
ël sôn ’d na làgrima
ch’la sgota su na prea:
i scolti domà ël romor
dl’èrba sèca ch’la canta...
In silensi
i nascondi ël tò nòm
tra cuj ch’is védan pu.
Sensa vos
i ’nventi ël trôn
d’on uss ch’a sbata...

[Dialèt noarèis]]

Scond premi al concors «Piemont ch’a scriv» 2014

AN SILENSI - An silensi, sot vos, / an duvertand n’uss / già spalancà / an ponta dij pé / drinta ’d mi / It ses anfilate... // An silensi, sot vos, / sforsand n’uss / ch’i savìa cricà, / an ponta dj’ale / coma na parpajòla / It ses volà lògn... // An silensi, / dë stërmà / it ses ëscapà / sensa feme sente / ël ciadel ëd n’uss ch’a sbat... // Ant ël silensi / as sent gnanca pì / ël son ëd na lerma / ch’a pica s’na pera: / i sento mach ël rumor / dl’erba sëcca ch’a canta. / An silensi / i stërmo tò nòm / an mes a coj ch’as vëddo pì nen. / Sensa vos / i anmagino l’arbombé / ëd n’uss ch’a sbat...