La Bibia piemontèisa/Testament Vej/Surtia/Surtia 36

←Surtia 35

La Bibia piemontèisa Surtìa (Èsod)

Surtìa 37→

Surtìa

La Bìbia piemontèisa - Surtìa 36

36

¹Parèj, donca, Bessalel, Oliab e tuti coj che Nosgnor a l’ha dotaje ‘d talent^[1] e d’inteligensa për fé d’ògni sòrt ëd travaj për ël servissi dël santuari, a butran an esecussion tut lòn che Nosgnor a l’ha comandà.

Ij cadò a l’ero fin-a tròp

²Mosè a l’ha donca convocà Bessalel, Oliab e tuti coj che Nosgnor a l’avìa dotaje ‘d bon-e man e ch’a l’avìo anvìa d’angagesse an col’ euvra e ‘d butela an esecussion. ³Mosè a l’ha fidaje ëd përson-a tut lòn che j’Israelita a l’avìo portà për l’euvra dël santuari. Tutun, dàit che minca na matin j’Israelita a portavo an continuassion d’oferte volontarie a Mosè, ⁴j’artësan ch’a l’ero ocupà ant ij vàire travaj dël santuari a l’han lassà mincadun ël travaj ch’a fasìo, ⁵e a son andàit a parlé con Mosè. A l’han dije: “Ël pòpol a pòrta pì ‘d lòn ch’a l’é necessari për l’euvra che Nosgnor a l’ha comandà ‘d fé. ⁶Antlora Mosè a l’ha ordinà ch’as publichèissa costa crija për tut l’acampament: “Che gnun, nì òm nì fomna, a pòrta pì d’oferte për l’euvra dël santuari”. E la gent a l’ha chità ‘d porté j’oferte: ⁷Soe contribussion ëd lor a l’ero pì che assé për completé ‘l proget antregh.

La strutura dël Tabërnàcol

⁸Tui artësan ch’a colaboravo ant l’euvra dël Tabërnàcol a l’han donca fàit des tèile ‘d lin bin filà ‘d fil tenzù ‘d pórpra violëtta o vërmèja, o ‘d color ëscarlata. A l’han ornaje con figure ‘d cherubin brodà ‘d manera artistica. ⁹Tute le tèile a l’ero precis dl’istessa mzura; quatòrdes meter ëd longhëssa e tre ‘d larghëssa. ¹⁰A l’han giontà l’ùn a l’àutr sinch ëd le tèile, e con j’àutre sinch a l’han fàit l’istess. ¹¹Peui a l’han fàit sinquanta ànsole ‘d pórpra volëtta e a l’han butaje an sla broa dl’ùltima tèila ‘d minca série. ¹²Le sinquanta ànsole 'rlongh la broa ëd na tèila a corëspondìo a le sinquanta ànsole 'rlong la broa dl’àutra tèila. ¹³Peui a l’han fàit sinquanta bocle d’òr e a l’han fissà ansema le tende longhe con le bocle. A l’é parèj che ‘l Tabërnàcol a l’é stait realisà tut d'un tòch.

¹⁴A l’han peui tëssù óndes tèile ‘d pluch ëd crava për fé na covertura dla tèila ch’a quata ‘l Tabërnàcol. ¹⁵Coste óndes tèile a l’ero precis dl’istessa mzura: quindes méter ëd longhëssa për des ëd larghëssa. ¹⁶A l’han giontaje ansema, da na banda, sinch tèile, e da l’àutra banda a l’han giontaje ansema j’àutre ses. ¹⁷A l’han fàit sinquanta àsole al bòrd ëd la tèila ch’a l’era a la broa dla prima série, e sinquanta àsole al bòrd ëd la tèila ch’a l’é a la broa dla sconda série. ¹⁸A l’han fàit sinquanta bocle ‘d bronz për gionté ansema la tèila, ëd manera da formé un tut ùnich. ¹⁹Për la tenda lor a l’han fàit ancora na covertura ‘d pèil ëd feja tenzùa ‘d vërmèj, e na dzora-covertura ‘d pèil ëd delfin.

²⁰Për sustnì ‘l Tabërnàcol, Bessalel a l’ha fàit ëd plance ‘d bòsch ëd gasìa e a l’ha butaje drite. ²¹ Minca na plancia a fasìa vint branche d’autëssa për tre ‘d larghëssa, ²²e a l’avìa doe ancastrure paralele: parèj a l’han fàit për tute le plance dël Tabërnàcol. ²³A l’han fàit donca le plance dël Tabërnàcol: vint për ël fianch meridional. ²⁴A l’ha ‘dcò fàit quaranta sòcoj d’argent e a l’ha butane doi sota ‘d minca na lesen-a, un a minca facia ‘d mincadun-a dle lesen-e. ²⁵Për lë scond fianch dël Tabërnàcol, ël fianch a nòrd, a l’ha fàit d’àutre vint plance, ²⁶con ij sò quaranta sòcoj d’argent sota le vint plance, doi për mincadun-a plancia. ²⁷për ël fianch ch’a l’é daré dël Tabërnàcol, ch’a dà a ponent, a l’ha faje ses lesen-e; ²⁸e doe da pì për ij sò doi canton darera. ²⁹Coste doe lesen-e a corispondìo a le doe colon-e dij canton, dal bas fin-a an àut, anté ch’a-i é ‘l prim anel. Parèj a l’han falo con le doe lesen-e dij doi canton. ³⁰An tut, a-i ero eut colon-e con ij sò sëddes sòcoj d’argent, valadì, doi sòcoj për minca na lesen-a.

³¹A l’ha peuj fàit ëdcò ‘d traverse ‘d bòsch ëd gasìa: sinch për le lesen-e d’un fianch dël Tabërnàcol, ³²sinch për cole dl’àutr fianch e sinch ëd pì për le lesen-e dël fianch da dré dël Tabërnàcol, ch’a dà a ponent. ³³A l’ha fàit che minca na traversa sentral a passèissa a metà autëssa dle lesen-e, da na banda a l’àutra. ³⁴A l’ha laminà d’òr le colon-e e le traverse, e a l’ha fàit d’òr j’anej che le traverse a l’avio da passeje.

Ij vel

³⁵Apress a l’ha fàit ël vel ‘d lin bin filà ‘d fil tenzù ‘d pórpra violëtta, vërmèja, o dë scarlata, con figure ‘d cherubin brodà ‘d manera artistica. ³⁶A l'ha fàit për ël vel quatr lesen-e ‘d bòsch ëd gasìa ch’a l’ha peui quatà d’òr. Ij sò rampin a j’ero ‘dcò d’òr. Për sostnì le lesen-e a l’han fondù quat sòcoj d’argent.

³⁷Për l’intrada dla tenda, a l’ha fàit n’àutr vel brodà’ d fil tenzù ‘d pórpra violeta, vërmèja, o dë scarlata. A l’era ‘d lin bin filà. ³⁸A l’ha fàit le sinch colòn-e con ij sò rampin, a l’ha quatà d’òr ij capitej e j’anej, ma ij sòcoj a l’ha faje ‘d bronz.

Nòte

1. O "sapiensa".