La Bibia piemontèisa/Testament Vej/Salm/Salm 108

←Salm 107

La Bibia piemontèisa Ij Salm

Salm 109→

Ij Salm

108. Mè cheur a l’é pront, Nosgnor, adess mè cheur a l’é pront

La Bìbia piemontèisa - Salm 108

Con ëd pcite variassion, cost salm a buta ‘nsema le paròle dël Salm 57:7-11 e 60:5-12.

¹Na càntica, un salm ëd David. Mè cheur a l’é pront, Nosgnor, adess mè cheur a l’é pront. I canterai e it lauderai con tut mè cheur. ²Dësvijeve, lira e arpa! Con mia càntica i dësvijerai la primalba. ³Nosgnor! Mi it rendrai grassie an mes al pòpol. I canterai toe làude an presensa ‘d tute le gent. ⁴Përchè toa misericòrdia a l’é pì àuta che ij cej. Toa fidelità^[1] a riva fin-a a le nìvole. ⁵Nosgnor! Ch’it sie esaltà dzora dij cej ij pì àut. Che toa glòria a splendrissa ‘n sù tuta la tèra!

⁶Ora salva toa gent, ch’it jë veule bin. Rëspond e salv-ne për ël mojen ëd toa potensa. ⁷Nosgnor a l’ha parlà an sò santuari. A l’ha dit: “I trionferai! Con argiojissansa i farai la division ëd Sichem. I pijerai le mzure dla val ëd Sucòt. ⁸Ghilead a l’é mìa; ëdcò mè a l’é Manasse. Efraim a l’é mè casch; Giuda a l’é mìa cavija regal. ⁹Moab a l’é ‘l bassin anté ch’im lavo. I farai che Edom am serva. I crijerai ‘d trionf an sla Filistìa”.¹⁰Chi am ëmnerà ant la sità fortificà? Chi am portrà a Edom?

¹¹Nosgnor! Forse ch’it l’has bandonane? Forse ch’it marcerai pa pì con nòstre armeje? ¹²Giut-ne contra ij nòstri nemis, dàit ch’a val bin pòch o nen l’agiùt ch’a podrìa dene l’òm. ¹³Con l’agiùt ëd la potensa ‘d Nosgnor, i faroma ‘d ròbe grandiose, përchè a sarà chiel ch’a pisterà ij nòstri nemis sota ij sò pé.

Nòte

1. O “vrità”.