La Bibia piemontèisa/Testament Vej/Re/1Re 6

←1 Rè 5

La Bibia piemontèisa Lìber dij Rè

1 Rè 7→

La Bìbia piemontèisa - 1 Rè 06

1 Rè

6

La costrussion dël Templi

¹L'ann quart dël regn ëd Salomon dzora d'Israel, ant ël mèis ëd Ziv, valadì ant lë scond mèis, quatzenteotanta agn dòp la surtìa dj'Israelita da l'Egit, a l'é dasse prinsipi a la costrussion dël templ ëd Nosgnor. ²Ël templi fabricà për Nosgnor da rè Salomon, a l'era longh 60 cùbit, largh 20, àut 30. ³Dë 'dnans al templ a-i j'era un pòrtich longh na vinten-a 'd cùbit, conform a la larghëssa dla costrussion e ch’a së slongava për des cùbit për tuta la longhëssa dël templi. ⁴Salomon a l’ha fàit ëdcò 'd fnestre për ël templi, anquadrà con ëd bare ‘d fèr.

⁵D'antorn a la muraja dël templ a l'é stàit drissà n'edifissi a pian, arlongh la navà e la cela. ⁶Ël pian pì bass a l'era longh sinch cùbit, col ëd mes ses e 'l ters sèt, përchè ij mur ëd drita a j’ero ‘d larghëssa scalà ‘d manera che le trav as dovèisso pa ancastré an sle muraje dël templi, ma as pogèisso an sù cole sporgense.

⁷Për soa costrussion a son dovrasse 'd pere travajà ant la gava midéma, parèj che ant ël cantié dël templi për tut ël temp dij travaj a son pa sentusse ciadej ëd massëtte, ëd pich o d'àutri utiss ëd fèr.

⁸L'intrada dël pian pì bass a l'era an sël fianch drit ëd la costrussion: për mojen ëd na scala a gargòta as passava dal pian pì bass a col dë dzora, e da lë scond al ters pian^[1]. ⁹Cora ch’a sarìa stàit fabricà dël tut, ël templ a l'é stàit quatà da vàire euvre an bòsch ëd séder. ¹⁰Tùit ij pian dlë stansie d'antorn al templ a s'aussavo ëd sinch cùbit e a l'ero colegà con ël templi për mojen ëd malasin-e 'd séder.

¹¹Anlora Nosgnor a l'é adrëssasse con soa paròla a Salomon: ¹²“Riguard a sto templi ch’it fàbriche, se ti të scote ij mè precet, s’it guerne mie prescrission, e s’it ubidisse ai mè comandament, mi i confërmrai la promëssa fàita a David tò pare. ¹³Valadì che mi i starai an mes ai fieuj d'Israel e i chiterai mai Israel, mia gent”.

L’intern dël templi

¹⁴Përparèj che Salomon a l'ha finì 'd fabriché ‘l templi. ¹⁵L’anterior antregh, dal paviment a le trav^[2], a j’ero quatà da panej ëd bòsch. Ij panej dle muraje e dla vòlta a l’ero ‘d séder, ma a l’ha dovrà ‘d plance d’arsipress pr’ ël paviment. ¹⁶Për realisé ‘n santuari andrinta al templi medésim, ciamà: “Ël santissim^[3]”, chiel a l’ha fàit pronté al fond dël templi na partission separà da ‘n mur ëd vint cùbit. Ël mur a l’era panelà con ëd bòsch ëd séder dal paviment a le trav. ¹⁷L'àula pì 'mportanta dël templ, an facia al santuari a l'era longa quarant cùbit. ¹⁸Ël templi d'andrinta a l'era tut an bòsch ëd séder e archincà con fruta e garlande 'd fior. Tut a l'era 'd séder; as vedìa gnanca na pera.

¹⁹Për l'èrca dl'aleansa 'd Nosgnor a l'era stàita prontà na stansia, un santuari 'ntern al fond dël templi. ²⁰Costa stansia dë drinta dël santuari a l'era lunga vint cùbit, larga l'istess e àuta vint. A l'é stàita placà con d'òr, parèj coma l'autar ëd séder. ²¹Salomon a l'ha dcò fàit plaché d'òr ël templi da ‘ndrinta. Dë 'dnans dël santuari 'ntern a l’ha penduje ‘n tendon sostnù da ‘d caden-e d’òr. Ëdcò col tendon a l’era quatà d’òr. ²²D'òr a l'era placà tut ël templi da 'ndrinta, e dcò l'autar dla cela a l'era arvëstì d'òr^[4].

²³Salomon a l’hà realisà doi cherubin an bòsch d’ulivé e a l’ha piassaje ant ël santuari 'nterior; a l'ero àut des cùbit a pr'un. ²⁴N'ala d'un cherubin a l'era 'd sinch cùbit, parèj come l'àutra ala; da n'ëstremità a l'àutra dj'ale a-i j'ero des cùbit. ²⁵Lë scond cherubin a l'era 'd des cùbit: a l'era dla midema forma e mzura dl'àutr. ²⁶Minca cherubin a l'era àut des cùbit. ²⁷Ij cherubin a son ëstàit piassà fianch a fianch ant ël santuari 'ntern dël templ. Soe ale a l'ero slargà. L'ala dël prim a tocava la muraja e l'ala dlë scond cherubin a tocava l'àutra parete an facia. Soe ale as tocavo ant ël mes ëd la stansia, ala contra ala. ²⁸Ëdcò lor a l'ero placà d'òr^[5].

²⁹An tute le muraje d'antorn dël templi, fòra e drinta, a l'ha amplissà tut con gravure e scolture 'd cherubin, ërbo ëd palma e boton ëd fior. ³⁰Tut ël paviment dël templ a l'é stàit peui placà d'òr, drinta e fòra.

³¹Salomon a l'ha fàit fé la pòrta dël santuari 'ntern con d'ànte an bòsch d'ulivé; ël fronton e jë stibi a formavo un pentàgon. ³²Ij dòi batent a l'ero 'd bòsch d'ulivé. Ansim' a l'ha fàit antajé 'd cherubin, palme e fior an boton, tut laminà d'òr, con feuje d'òr martlinà dëdzora dij cherubin e dle palme. ³³La midema manera a l'é adotasse për la pòrta dla navà, ch’a l'avìa dë stibi an bòsch d'ulivé a forma quadra.

³⁴Le pòrte a l’avìo dcò dòi batent ëd  bòsch ëd sapin; minca ‘n batent a consistìa ‘d dòi tàule^[6] ch’as dobiavo. ³⁵Coste pòrte a j’ero gravà 'd cherubin, palme e boton ëd fior, tut patinà d'òr arlongh. ³⁶La muraja dla cort da drinta a l'é stàita fabricà con tre órdin ëd pere squadrà e con n'órdin ëd trav ëd séder.

³⁷Ant ël quart ann, mèis ëd Ziv, a l'ero campasse le fondamenta dël templ ëd Nosgnor. ³⁸Ant l'ann che a fà óndes, ant ël mèis ëd Bul, ch'a l'é ël mèis ch’a fà eut, ël templ a l'é stàit finì an tute soe part e con tut lòn che a-j servìa. Salomon a l'ha falo buté an pé an sèt agn.

Nòte

1. Pessità sirìaca e Volgata a l'han: הַשְּׁלִשִׁית (ha slissit, "ël ters") pitòst che 'l TM הַשְּׁלִשִׁים (ha slissim, "ël trentésim").
2. Ël TM a les קִירוֹת (qiròt, "muraje"), ma sòn a l'é andova a dovrìo esse gropà a: קוֹרוֹת (qoròt, "trav").
3. Cfr. Surtìa 26:33-34.
4. Cfr. Surtìa 30:1-3.
5. 6:23-28 cfr. Surtìa 25:18-20.
6. Ebràich: "doe feuje dla prima pòrta as dobiavo parèj come doe feuje dla sconda. Ant la sconda metà dla conta, ël test masorétich a l'haקְלָעִים (qëla'im, "ténde").N'àutr test ebràich masorétich, jë LXX, la version sirìaca e la Volgata a dan צְלָעִים (tzla'im, "feuje").