Introdussion[modifiché]

Ël lìber dël profeta Naum a nunsia 'l giudissi 'd Nosgnor an sla sità 'd Ninive, capital dl'Assiria. Ant ël sétim sécol a. C. costa nassion a dominava an sù tuta la region dël Vzin Orient, e 'l regn ëd Giuda a l'era un dij sò vassaj. Ël lìber ëd Naum a peul, donch, esse datà tra 'l 663 a. C. l'ann anté che Tebe, sità capital dl'Egit, a l'era stàita butà a sach da j'Assir (cfr. 3:8) e 'l 612 a. C., l'ann anté che Ninive a l'é crovà assedià dai Medi.

Ël cit lìber ëd Naum a peul dividse an tre part. La prima (1:2-9) a proclama che Nosgnor a l'é 'l dominator ëd tut ël mond, e a chiel nen a peul arziste. La sconda (1:9-2:3) a mostra coma che la potensa 'd Nosgnor a agissa ant la situassion ëstòrica 'd col temp-lì: chiel a dëstruerà Ninive e a libererà 'l pòpol dël regn ëd Giuda. La tersa a fà la dëscrission ëd la ruin-a 'd Ninive e la fin ëd sò podèj.

Naum a parla a la gent ëd sò temp ëd la giustissia e dla potensa 'd Nosgnor. Chiel a manifesta bontà e passiensa anvers ëd sò pòpol ch'a fà 'd chiel sò arfugi, ma a pronunsia 'n giudissi sensa misericòrdia e spaventos contra dij nemis ëd soa nassion. Ninive a sarà pi nen bon-a a arziste a la devastassion inevitàbila ch'a në sarà colpìa. Ninive, contut, a l'é dcò 'l simbol ëd minca podèj uman ch'a sia fondà an sij presupòst che chiel a arfuda. E minca 'n podèj ëd costa sòrt a l'é destinà a la ruin-a.

Schema[modifiché]

Nosgnor a l'é 'n dio teribil e bon - 1:2-8.
Mëssagi për le sità 'd Ninive e 'd Giuda - 1:9-2:3.
La dëstrussion ëd Ninive - 2:4-3:19.