Introdussion

I savoma pa 'd precis cand ch'a sia che Gioel a l'àbia esercità sò ministeri profétich. La pì part dij savant a pensa che sò lìber a sia stàit butà ansema apress ëd l'esili an Babilònia, apopré dël quint o quart sécol a. C. Na data anans dl'esili, coma p. es. dla fin dël sest o sétim sécol a l'é men probàbil. Comsëssìa, 'l profeta as adressa a na comunità ch'a speta "ël di 'd Nosgnor", e cost-sì a l'é 'l soget ëd la predicassion ch'a l'a servà ant ij sécoj na fòrsa strasordinària.

"Ël di 'd Nosgnor" a l'é presentà dzortut coma 'l di anté che Nosgnor a manifesta sò domini an sla stòria e a giùdica tùit ij pòpoj. L'avzinesse 'd cost di afros ël profeta a në fà la dëscrission con na série 'd disastr: invasion ëd cravëtte, suitin-a, d'incendi. Coste-sì a son d'imàgin ëd dëstrussion da fé spavent, ch'a fan nasse 'n sens ancreus d'angossa. Tutun, ël profeta a anvita a passé da la pau a la conversion. A-i é da bzogn d'artorné a Nosgnor, arpentisse dai comportament gram, e fidesse al Signor, a soa passiensa e bontà.

A l'é antlora che Nosgnor a scoterà sò pòpol ch'a l'é arpentisse e a-j darà pas, bin-esse e gòj. Sò giudissi sever a fraperà le nassion ch'a combato contra Israel. Cole nassion a saran vastà antant che 'l Signor a starà an mes ëd sò pòpol, a Gerusalem, e 'l teritòri 'd Giuda a vivrà an sicurëssa e ant l'abondansa dj'arcòlt.

"Dòp ëd sòn i spantierai mè Spirit ëdzora tute sòrt ëd gent. Ij vòstri fieuj e le vòstre fije a profetiseran, i vòstri grand a l'avran ëd seugn, ij vòstri giovo 'd vision" (2:28). Ant ël di dla Pancòsta le paròle 'd Gioel a saran arpijà da l'apòstol Pero, ch'a mostrerà coma 'nt ël don dlë Spirit (At 2:16-21), capità an col di-lì, as compiss la paròla dël profeta.

Schema

Invasion ëd le cravëtte e di 'd Nosgnor (1:2-2:27).
La spantiora dlë Spirit (2:28).
Ël progèt ëd Nosgnor ëd giudiché le nassion (3:1-16).
La presensa dël Signor an Sion (3:1-21).