La Bibia piemontèisa/Testament Vej/Genesi/Introdussion a la Génesi

Da Wikisource.

Artorn


Introdussion al lìber ëd la Génesi[modifiché]

La paròla “Génesi” a veul dì “prinsipi”. Génesi a l’é ‘l liber dj’orìgin, dj’inissi, ch’a conta coma ch’a son comensà tante ròbe: nòst univers, la rassa uman-a, ël pëccà, la redension, la vita dla famija, dla corussion ëd la sossietà uman-a, dle nassion, ëd le diverse lenghe e dël pòpol d’Israel, ël pòpol sernù da ‘nté ch’a l’é surtì ‘l Salvator dël mond. A conten la prima promëssa ‘d soa vnùa: Génesi 3:15. A l’é nen l’intension ëd la Génesi ‘d conté ‘d manera detajà (coma ch’a farìo ij modern) tùit ij detaj dj’aveniment ch’ a na parla, ma ‘d buté an evidensa lòn ch’a giùdica ùtil për trasmëtte sò mëssagi ‘d vrità. Le conte dla Génesi a l’han pa nen da fé con le mitologìe dij pòpoj dë sto mond, dont a l’é, pitòst, la critica. La tradission a indica coma l’autor ëd la Génesi a l’é Mosé e ch’a lé stàit butà 'nsema apopré dal 1450 al 1410 a. C.